انا سناء شفيق من سكان منشية ناصر, اصلا احنا من الصعيد , اول ما اتعرفت علي جمعية حماية البيئة كان من 26 سنة ايوه من 26 سنة ... كنت بنوتة صغيرة لسه بضفاير ذي مابيقولوا يدوب 14 سنة , بدأت ادرك الدنيا من حوليا لاول مرة لما طلعني ابويامن المدرسة , ودي كانت بالنسبالي صدمة مش سهلة .. مع اني كنت شاطرة ونبيهة المدرسين كانوا بيقولوا عليا كده , وامي كانت بتقول عليا كده, كمان انا كنت بحب المدرسةجدا , كان صعب علي نفسي قوي وانا شايفة البنات والولاد اصحابي الصبح وهما ماشين بلبس المدرسة , وهما راجعين اخر النهار , الحمد لله نشكر ربنا علي كل حال . ساعتها انا كنت في تالتة ابتدائى, وقتها مكنتش عارفة ايه السبب الي يخلي ابويا يطلعني من المدرسة, بس لما كبرت عرفت الاسباب,ظروفناالمعيشية كانت صعبة شوية, مكنش في وسع زي دلوقتي, برده موضوع التعليم مكنش هو الاولويه, المهم كنا نعيش , ناكل ونشرب يعني, وبعد كده اي حاجة تانية , بردو كانوا بيخافوا علينا نطلع بره المنطقة خصوصا البنات . اول ما حطيت رجلي في الجمعية بصراحة قابلوني مقابلة كويسة قوي اتكلموا معايا اتعرفوا عليا وعلي ظروفي , ابويا كان مطمن عليا معاهم , سألوني في الاول تحبي تتعلمي ايه ؟ اخدت فترة تدريب لمده سته شهور فى السجاد بس بصراحة مالقتش نفسى فيه اوى, بعد كده حبيت اتدرب فى المشغل وفعلا حبيت الشغل هناك اوى ,وعجبنى الشغل وحكاية استخدام بواقى القماش والافكار الكتيرة اللى بتتعمل منها زي المفارش والمخدات وحاجات تانية كتير,وركزت اوى فى شغلى واتعلمت بسرعة حبيته وبقيت باطور فيه, النهاردة انا مشرفة انتاج لعدد 100 سيدة من اسر جامعى القمامة , كمان مسئولة عن توزيع الشغل واختيار الانواع والالوان والرسومات و مسئولة عن تدريب البنات والستات الجداد اللى بينضموا لمشغل الجمعية ,كمان لقيت نفسى محتاجة اطور قدراتى اكتر واكتر و اصريت على استكمال تعليمى , وحقق الحلم بتاع زمان فدخلت محو الامية فى الجمعية , اخدت شهادة محو الامية الحمد لله , مش كده بس , انا كمان كملت اعدادي , اخدت الاعدادية وانا في الجمعية , في الحقيقة الجمعية كانت بتوفرلنا فصول استذكارومدرسين للاعدادى وللدبلوم , يعني لا هاروح ولا هاجى ولا اخرج من بره المنطقة , كملت لحد ماخدت الدبلوم نشكر ربنا. التعليم فرق معايا كتير فى شغلى فى وتطور قدراتى , اتعلمت بقيت باقدر ادخل على النت واختارالتصميمات والرسومات وافكار جديدة للشغل مع المتطوعات , وقدرت كمان اتعلم كومبيوتر واعمل كشوفات المرتبات للعاملات بالمشغل كل شهر , شغلى فى الجمعية فرق معايا كتير فى قدرتى على مواجهة المجتمع بعد ماكنت باخاف امشى فى الشارع لوحدى ومش باعرف اطلع من بيتنا بقيت باطلع معارض لمنتجات الجمعية خارج المنطقة واعرض شغل الجمعية واتكلم مع الناس مصريين واجانب واحكى لهم عن الجمعية بكل ثقة وافرجهم على المنتجات علشان المبيعات تكتر ونقدر نشغل اكتر عدد من البنات ونفيد ناس كتير .شغلي في الجمعيه فرق معايا في طريقة تعاملي مع جوزي ومع عيالي ولما دخلوا المدرسة بقيت باعرف اذاكرلهم الدروس واتابعهم فى المدرسة , شغلي في الجمعية بنى شخصيتى و زود دخلي ودا ساعدنى كتير في المعيشة . اختى الصغيرة اهتميت بيها وماحبتش يحصل معاها زى اللى حصل معايا فاصريت انها تكمل تعليمها وخليتها تيجى الجمعية وتاخد فيها الدروس لحد ماوصلت الليسانس السنة دى , وكمان شغالة معانا فى الجمعية فى فصول الاستذكار ...... انا بشكر جمعية حماية البيئة وبشكر كل حد وقف جنبي لغاية ما وصلت للي انا وصلتله .